Kongres Batak KTP Kok Dibangga-banggakan?

BERSPONSOR

NINNA.ID – Na apala pabuni hu ma huroa. Ima apala piga-piga manukkun tu au. Adong sian parpunguan WA. Adong sian FB. Adong muse langsung di-chat tu au. Hurang lobi, on ma didok nasida. Hurang saparagraf nai. Dia hurangna, nikku ma mangadopi. Dang tongon ulu ni gurit-gurit i tu isina, ninna nasida. Mekkel suping au.

Dihana ma naeng naso tongon i? Alai boi dapot roha. Dang tutu apala tangkas hupaboa. Angka namalo do namarugasan i. Diuluhon sada profesor do hubege. Profesor sastra Batak molo dang salah au. Ala ni i, hubaen ma gurit-gurit i buni. Asa apala holpu roha nasida manjaha. Ipe molo tung dijaha. Hape, di bagas rohakku, sada singot-singot do i.

Molo di hata Indonesia, kritik ma goarna. Kritik tersembunyi. Alai, tumingha huroa bunina. Pabuni hu kritik i. Gabe dang dapot nasida. Alai, dang porsea au. Naboi dijaha nasida do singot-singot na buni i. Angka namalo do. Profesor barang on. Pamalo hu gariada. Pola ma tahe, sampe lupa nasida marhata Batak.

Hupaihut-ihut sian YouTube. Las rohangku saleleng on. Kongres Kebudayaan Batak. Tarhira mengihut tu Kongres Pemuda ma on. Nga taboto be, sian Kongres Pemuda i do alana. Dung i, martahi ma hita angka na poso. Mungkin marpudun. Dang apala ra sahat tu namartolon. Tadok ma tikki i: sisada aek dohot tano, jala sijujung hata Indonesia.

BERSPONSOR

Tupudian ni ari, digoari ma ugasan i Sumpah Pemuda. Attar songoni ma didok rohangku Kongres Kebudayaan Batak i. Dang pola salah ra nahusangkapi sian kongres i. Tarlomobi akka sihataan taringot pustaha, taringot aksara, taringot hata Batak. Jala muse, dohot sipagogo suara, didok nasida ma: sudah mulai banyak yang lupa bahasa Batak. Esse, marbahasa akka namalo.

Mengkel hian au. Naeng tangis do nian. Angka na malo do nasida. Alai, mengkel ma au. Godang do namalo pamalo-malohon. Godang muse namalo gabe oto dijolo ni sihumisik. Bohama tahe. Dihalungunhon nasida hata Batak i ala so apala totop jala torop be dihatahon. Tahi ni nasida, asa tong ma tahatahon. Alai, nasida pe marhata Indonesia.

Sai hupaihut-ihut Kongres i. Sian Youtub do. Dang parsidohot au tu san. Angka jolma namalo do tusi. Ido alana diuluhon sada profesor. Jolma nabeteng do ibana di parbinotoan. Huingotingot rupani, apala taon na salpu ma. Adong ma ujian. Jalur Rempah judulna. Ujian on sian Kemendikbud. Pendek hataon, ujian ma hami.

Sampulu halak do dibuat uju i di ujian parjolo. Husimpan dope sahat tu sadari on. Dang adong goar ni profesor i. Alai, munggil ma huroa roha ni panitia. Gabe tarida ma profesor i di pasampuluhon. Piga-piga hami tikki i protes. Alai ninna nasida ma. Tu hata Batak ma hubaen: Nitijuran ma ate-ate, gurunghu do nasida. Boi dapot roha.

TERKAIT  Ritual Gondang Mandudu (II)
BERSPONSOR

Ingkon hormatan do guru. Huingot uju i, di ujian parjolo, juara 2 ma au. Juara 1 par Tebing Tinggi. Alai, sian 10 halak i, holan 5 do buatonna. Sae ma rupani ujian i. Songgot rohanghu. Sian 5 nadibuat sian si sampulu i, dang adong goar ni juara 1. Songoni nang goarhu. Jala goar ni profesor i, martimbuk ma sian 10 tu nomor 1.

Sian i ma mulana huboto, nabeteng do profesor i. Hubege ma muse angka namalo naparsidohot. Sai godangan marhata Indonesia. Bah, nga lari on, inna rohanghu. Hupaihut-ihut jala sai hurimangi tahi di ugasan i. Pustaha ma. Aksara ma. Hata Batak ma. Bunghu bahasa Batak muse asa polin. Jala jut roha nasida: bahasa Batak sudah mulai dilupakan.

Sai marhata Indonesia. Adong do nian sasahali marhata Batak. Alai, nga godang i 5 porsen. Tarhira molo marpidato bahasa Indonesia ma hita sai tagulmithon tu bahasa Inggeris. Songoni ma nasida. Marhata Indonesia alai sasahali digulmithon tu hata Batak. Ah, angka na malo tahe, inna roha. Alai, nang pe songoni, ihuthonon do nasida.

Inna ompunta do, namalo tu panggadisan, naoto nampuna hata. Ima asa hubaen hata on. Tarbalik do ra umpama i. Alai, ugasan i pe rupani tarbalik do dang i? Rade hamu manijuri ate-ate muna molo tung salah pe au. Ai ramba naposo dope au, naso tubuan lata. Naposo dope naso unboto hata. Jadi, marpanganju ma hamu.

- Advertisement -

Toema. Taujungi ma gurit-gurit on. Dang nian naeng hugurit hian on. Alai, ala piga-piga manukkun, ra, dang dapot nasida kritik tersembunyi i. Pabuni hu. Ala ni i, ra ninna tahi nasida, unang pabuni hu baen. Ala ni ido hugurit muse. Di son, dang buni be hubaen. Nga tangkas songon indahan di balanga. Alai, gabe olo do buni ala hubaen hata Batak. Atik boha dang diantusi hata Batak, dang i?

Ala ni i, hubaen ma tarbalik. Ulu bahasa Indonesia. Isi na bahasa Batak. Tarsongon ugasan ni kongres i. Diuluhon angka namalo. Dung i, sai marsigor-gor di roha nasida, hita do namalo, i do alana marhata Indonesia i godang an jala sai digulmithon tu hata Batak. Hape, hita na oto pe taboto do, ise na hibul rohana, ise na holan, jeng-jeng-jeng. Dang pola hupaboa jeng-jeng-jeng i akke. Taboto be ma.

Panggurit : Riduan Pebriadi Situmorang
Pamareso guritan : Mahadi Sitanggang

BERSPONSOR

ARTIKEL TERKAIT

TERBARU